सोलापूर - जिल्ह्यातील गॅस एजन्सीसमोर सिलेंडरसाठी होणारी गर्दी आणि रांगा टाळण्यासाठी प्रशासनाने २३ मार्च रोजी स्पष्ट आदेश दिले आहेत. तरीही काही ठिकाणी नियमांचे उल्लंघन होत असल्याचे निदर्शनास आल्याने, जिल्हाधिकारी कुमार आशीर्वाद यांनी गॅस कंपन्यांना कडक सूचना दिल्या आहेत. "गॅस एजन्सीवरून थेट सिलेंडर पुरवठा करू नये आणि अवैध विक्री टाळावी, अन्यथा संबंधित एजन्सीवर कठोर कायदेशीर कारवाई केली जाईल," असा इशारा त्यांनी दिला आहे.
जिल्हाधिकारी कार्यालयात आयोजित गॅस कंपनी प्रतिनिधींच्या बैठकीत ते बोलत होते. यावेळी जिल्हा पुरवठा अधिकारी संतोष सरडे आणि विविध गॅस कंपन्यांचे वरिष्ठ अधिकारी उपस्थित होते.
गॅस एजन्सीच्या गोदामातून किंवा कार्यालयातून सिलेंडरचे वितरण होणार नाही, केवळ घरपोच (Home Delivery) सेवा दिली जाईल.
अहवाल सादरीकरण: गॅस कंपन्यांनी दररोजच्या पुरवठ्याचा आणि वितरणाचा अहवाल दुसऱ्या दिवशी दुपारी १२ वाजेपर्यंत पुरवठा विभागाला सादर करणे अनिवार्य आहे.
पोलीस संरक्षण: गर्दी होणाऱ्या संभाव्य एजन्सींची यादी मागवण्यात आली असून, आवश्यकतेनुसार तिथे पोलीस बंदोबस्त तैनात केला जाईल.
सौजन्याची वागणूक: एजन्सी कर्मचाऱ्यांनी नागरिकांना पुरवठ्याबाबत माहिती देताना अत्यंत सौजन्याने वागावे, अशा सूचनाही देण्यात आल्या आहेत.
"जिल्ह्यात गॅसचा पुरेसा साठा उपलब्ध आहे. ऑनलाईन बुकिंग केल्यानंतर सरासरी साडेचार दिवसांत सिलेंडर घरपोच मिळत आहे. त्यामुळे नागरिकांनी घाबरून न जाता एजन्सीसमोर गर्दी करू नये आणि प्रशासनाला सहकार्य करावे." — कुमार आशीर्वाद, जिल्हाधिकारी, सोलापूर
सध्या जिल्ह्यात गॅस पुरवठा सुरळीत होत असून, ज्या भागात विलंब होत आहे तिथे अतिरिक्त पुरवठा करण्याचे निर्देश देण्यात आले आहेत. पीएम उज्ज्वला योजनेतील लाभार्थ्यांनाही ४५ दिवसांच्या मर्यादेत सिलेंडर उपलब्ध करून दिला जात असल्याची माहिती यावेळी देण्यात आली.
0 Comments